ތާރީޚާއި ތަރިކައާ ބެހޭގޮތުން އައްޑޫ ހައި ސްކޫލްގެ ދަރިވަރުންނަށް މައުލޫމާތު ދިނުމުގެ ސެޝަންތަކެއް މި މަހުގައި ކުރިޔަށް ގެންދެވުނެވެ. މިއީ އެކުދިން މައިދާނީ ދަތުރެއްގައި ލާމު އަތޮޅަށް ޒިޔާރަތްކުރުމުން އެ ސްކޫލްގެ އެދިލެއްވުމަށް ހިންގުނު ސެޝަންތަކެެކެވެ.

ހައްދުންމަތީގައިހުރި އާސާރީ ތަންތަނާއި ޠަބީޢީ ތަރިކަތަކުގެ މައުލޫމާތުތައް މި ސެޝަންތަކުގައި ދެވިފައިވެއެވެ. އައްޑޫ ހައި ސްކޫލުގެ ގްރޭޑު 12ގެ ދަރިވަރުން، 22 އެޕްރީލް – 30 އެޕްރީލް 2024އަށް ހައްދުންމައްޗަށް ކުރި މި މައިދާނީ ދަތުރުގައި ގަމުގައި ހުރި އާސާރީ ތަންތަނުގެ ތެރެއިން ގަމު ހަތްތެލި، ބުންބެރަ، އިހު މާމިސްކިތް، އަދި ޕަރީ ފެންގަނޑު ފަދަ ތަރިކަތައް ބަލައިލުމަށް ޒިޔާރަތްކޮށްފައިވެއެވެ.

މިފަދަ ތަރިކަތައް އަންނާން އޮތް ޖީލުތަކަށް ފެންނާނެހެން ހިމާޔަތްކޮށް ބެލެހެއްޓުމުގެ މުހިންމުކަމާއި އެތަންތަނަށް ޒިޔާރަތްކުރުމުގައި އަމަލުކުރަންޖެހޭ ގޮތްތަކާބެހޭގޮތުން ވެސް ދަރިވަރުންނަށް މައުލޫމާތުދެވިފައި ވެއެވެ.